القائمة الرئيسية

الصفحات

اشتغل اوبر ولا كريم | شركة كريم | أوبر وكريم 2020 | اشتراك أوبر | تطبيق كريم و أوبر مصر | الفرق بين اوبر وكريم

اسرار العمل في اوبر و كريم مصر 2020
المشروع كاملا مع نصايح مهمه للعمل في اوبر و كريم






تعديل : الموضوع التالى حصرى لموقعنا 100% و قمنا بكتابتة عن تجربة شخصية. و تم نشرة يوم 28/4/2020 للاسف قد قام احد المواقع الحديثة بنسخ الموضوع كلة و نشرة باسمها بدون الرجوع الينا بتاريخ 12/5/2020 و قد تم تقديم بلاغ لجوجل و جارى اتخاذ اللازم من قبل الشركة المحترمة .  

عاوز تشتغل فى اوبر و كريم و تعرف اسرار الشغلانه تعال معايا في السطور الجايه و انا اعرفك كل حاجه عن الشغل فى اوبر و كريم و متنساش ان فية موضوعين استكمالا للموضوع دة



مما لاشك فيه ان الكل يبجث عن مصدر للدخل . او اذا كان هناك مصدر للدخل فالبعض يبحث عن وسيله لتحسين الدخل و كما تعودنا من خلال موقع اسره مصريه  ان نسعى لتبيه احتياجات الاسره المصريه من تعلم و تكنولوجيا و تربيه الى اخره

اليوم نتحدث عن اوبر و كريم كمشروع لتحسين الدخل لمن يبحث عن تفاصيل و خبايا الشغلانه او شروط العمل فى اوبر وكريم او ارباح اوبر وكريم عموما او حتى هل يعمل لاوبر ام يعمل لكريم الكثير من الاسئله سوف نجاوب عليها فى الموضوع التالى 

بدايه هل اعمل لاوبر ام ل كريم 

فى راينا  المتواضع وعن تجربه شخصيه فالشركتين سواء و ليس بينهم الكثير من الخلافات خصوصا بعد استحواذ شركه اوبر على شركه كريم . بل و الاكثر من ذلك و من اول فبراير اتحدتا الشركتين و تم فتح نظام البلوكات معا . بمعنى انه من كان عنده بلوك في كريم و يعمل لصالح اوبر اصبح بعد فتح السجلات عنده بلوك من اوبر و كريم معا 
و على الاغلب يجب ان تملك العمل مع الشركتين فى ان واحد بحيث انك عند اتمامك رحله خاصه باوبر مثلا و عند انهاء الرحله لن تنتظر الكثير لو كنت تستعمل ال 2 ابلكيشن مع بعض . خلاف ان كنت تستعمل واحدا فيمكن ان تنتظر في مكانك بعض الوقت حتى تاتيك رحله اخرى




الحالات التى لا انصحك فيها بالعمل مع اوبر او كريم 

1- ان كنت لا تملك سياره و تنوى شراء سياره من اجل العمل فى اوبر او كريم خصيصا
2- ان كنت تنوى استئجار سياره شهريا او يوميا و تنوى العمل فى اوبر و كريم 
3 - ان كانت سيارتك قديمه نسبيا و تحتاج الى الاصلاحات الكثيره على فترات متقاربه 
4 - ان كنت تعتقد ان اوبر و كريم مربحه لدرجه ان تستبدلها بعمل انت فيه الان و يدخل لك دخل معقول 
5 - ان لم يكن عندك المزيد من الصبر و التريث و الابتسام في وجه العملاء في اصعب الظروف

خلى بالك معايا اوى في الكلمه دى ..
اوبر شديده الالتزام و الرسميه وراعى خطواتك معاهم جدا
..كريم متساهله الى حد ما ممكن تغلط و تسامح 

شروط التقديم لاوبر و كريم  2020

 - السن يبداء من  21 عام  حتى سن45 عام
 - رخصه سياره ساريه مش شرط باسم المتقدم
 - رخصه قياده خاصه او اعلى ساريه باسم المتقدم 
 - تحليل مخدرات هيتعمل من معمل المختبر أو من نايل سكان
 - فيش جنائي سليم ساري لم يمر عليه أكثر من 6 شهور
 - بطاقه شخصيه للمتقدم ساريه 
 - فحص ناسينا للسياره بالنسبه لاوبر أو غطاطى بالنسبه لكريم

السيارات المقبوله للعمل في اوبر و كريم 

عشان تكون في المضمون من اول 2008 في بعض الموديلات العاليه و 2010 في بعض الموديلات العاديه 


افضل الموديلات الشائعه للتقديم في اوبر و كريم

سبرانزا / شيفروليه لانوس / فيرنا /امجراند /انفي
النترا 2008 وانت طالع /اوبترا / افيو /بي واى دى
عموما اى سياره فب الفئات الاقتصاديه 1300 / 1500 cc و تكون من العربيات الشائعه الاستخدام ذات قطع الغيار المتوفره الرخيصه (الشعبيه)

خطوات العمل مع اوبر و كريم 

اولا .. ابحث عن التقديم المباشر و ليس تبع الوكلاء

لماذا .. لان الوكلاء أو المكاتب عمولتهم أعلى من المباشر 
مثال .. ارباحك الاسبوع ده  مثلا 1000 جنيه لو تبع مكتب بياخد من ال 1000 ج دول 50 ج و بتاخد 950
لو مباشر ..بتاخد فلوسك كامله
غير كده المكاتب مش بتفيدك بشئ لو جالك لاقدر الله بلوك من الشركه ..
لكن لو مش من سكان القاهره او الاسكندريه يستحسن الارتباط عن طريق المكتب لان فروع اوبر بالاخص فى القاهره و اسكندريه فقط

رابط موقع اوبر مباشر من هنــــــــــــــــــــــــــــــــــا  , و بداخل موقع الشركه هتلاقيه بيقولك الفرق بين انك تشتغل تبع مكتب و بين انك تشتغل مباشر تبع الشركه  . وكمان هتلاقى قايمه من العربيات المقبوله للعمل لدى اوبر ...

رابط موقع كريم  مباشر من هنـــــــــــــــــــــــــــــــــا  . و برضه هتلاقى نفس الموضوع زى ما حصل مع اوبر فى السطور اللى فوق 

ثانيا .. اتباع الخطوات الموجوده بالمواقع 

املا الحقول الموجوده من واقع بطاقتك الشخصيه و اضغط اشتراك و هم سوف يتصلون بك فى خلال يومان و بيجيلك كود في رسائل عالموبايل المسجل عندهم اللى حضرتك ضيفت رقمه و انت بتسجل 
طبعا لو حضرتك تبع الشركه مباشر و خصوصا اوبر يبقي محتاج تاخد محاضره قبل تفعيل الابلكيشن عشان يفهموك الموضوع و دى بتبقى في مقر الشركه بالقاهره
اما لو اوبر لكن مشترك تبع المكتب  الوسيط بيسمحولك تاخد المحاضره فى المكتب اللى انت تبعه لكن فى اغلب الاحوال المكتب بيكبر دماغه و بيكتفي انه يكلمك في التليفون 

ثالثا .. بتفتح الابلكيشن بتاعك و تبداء في استقبال الرحلات 

لكن دايما استقبل الرحلات و انتا واقف عشان تعرف مكان العميل و تتوجه عليه بالشكل الصحيح

بدات الشغل خلاص و كله تمام

اهلا بيك يا كابتن و ده لقبك في الشغلانه دى و هنبتدى نتكلم بالعاميه بقي عشان اعرفك الكبيره و الصغيره في الشغلانه دى لوجه الله تعالى 

في الغالب انت دلوقتى الابلكيشن هيفتح معاك بالفيش و الرخصه و البطاقه ... هيسيبوك شويه قيمه شهر و بعدين يطلبوا منك تحليل المخدرات و فحص العربيه .. حاول تجهزهم من تانى يوم ما تبدا شغل لان هتلاقي الابلكيشن وقف و حتى بعد ما ترفع الفحص و التحليل  هتاخدلك 3 / 4 ايام انتا اولى بيهم .

بعض المصطلحات المتعارف عليها في الشغلانه دى 

** الجرانتى و البونص 

الجرانتى هو اكمال عدد معين من المشاوير اليوميه بشروط معينه مثل نسبه القبول و التقييم .. المهم بيكملولك لحد مبلغ معين بيكون معلن قبل الشغل 
مثلا لو فرضنا ان فيه جرانتى من الساعه 6 ص الى الساعه 10 ص  ب (120 جنيه مثلا ب 6 رحلات )
لو حضرتك عملت ال 6 رحلات دول و حسابك طلع 80 جنيه في الحاله دى الشركه بتكملك المبلغ لحد ال 120 جنيه 
يعنى بتضيفلك 40 ج

البونص .. عدد رحلات معين بتعمله في فتره زمنيه مدتها اسبوع بشروط معينه برضه و بتاخد مبلغ من الشركه ملوش دعوه باى حاجه ..مثلا عندك 100 رحله خلال الاسبوع عليهم 100 ج .. بتشتغل عادى جدا و بتاخد حسابك من كل رحله و بعدين اخر الاسبوع بيبعتولك ال 100 جنيه اللى قالولك عليهم 



** المديونيه 

المديونيه هى عباره عن ان تشتغل رحلات و تقبض فلوس من العميل اسمها رحلات (كاش ) و تحط في جيبك 
ساعتها افتكر ان ربع اللى في جيبك ده بتاع الشركه .. وفى الحاله دى بيتحط عليك مديونيه بتتكتب لك في الابلكيشن بعد كل رحله 

المفروض انك اخر الاسبوع بتسدد المديونيه اللى عليك فى اى حد عنده خدمه فورى .. ده فى حاله انك معملتش بونص و لك عندهم فلوس . ساعتها بيخصموا الفرق من بعضه

نيجى للواقع بااااااه ....بالنسبه لاوبر ممكن تشتغل بمديونيه مفتوحه  اسبوع ورا اسبوع لجد ما اللى عليك يبقى كتير اوى و هوب ييجوا قافلينلك الابلكيشن و ده فى الغالب للمبلغ الاكتر من 500 ج و انت طالع 

بالنسبه لكريم اول ماتوصل مديونيتك 150 ج الابلكيشن بيقفل تلقائى لكن عن رحلات الكاش بس و ساعتها بتبقى شغال على رحلات الفيزا ... يعنى بيجيلك رحلات فيزا بس لحد ما مديونيتك تقل و يرجع يستقبل فيزا مع كاش 

** رحلات الفيزا و الخصومات و العروض اللى تتيحها الشركه للعملاء 

اوعى تتفاجى لو وصلت عميل لمده ساعتين مثلا و لفيت كتير جدا بالعربيه و الراجل كان معاه شويه شيل على شنط على كام فرخه و بط ووز و مراته و عياله و كل حاجه ممكنه و فى الاخر طلع حسابك 5 جنيه  او طلع 0 او قالك مشوار فيزا اوعى تتهور و تكشر فى وجه العميل او تشد معاه فى الكلام .. لازم يكون عندك صبر 
في عملاء رابطين حساب اوبر و كريم بالحساب البنكى الخاص بيهم .. الفلوس  بتتخصم تلقائى من البنك يبقى بالتالى هيركب مش هيدفع 
او عميل معاه عروض او كود او اى حاجه المهم اعرف كويس ان ملكش علاقه ككابتن ب الخصومات دى حسابك بينزلك كامل من الشركه 

** التقييم 

المفروص .... ان لتقييم ده انطباعك و انطباع العميل كل منكم بيقيم الاخر عن طريق الابلكيشن بعد انتهاء الرحله عن طريق اضافه عدد من النجوم من 1 حتى 5

 الواقع ......لو انت ملاك من السماء و معاك شهاده ان اخلاقك عاليه هتلاقى واحد عميل ركب معاك و فى الاخر قيمك بنجمه واحده .. متستغربش طالما الاغلبيه العظمى مقدراك كويس و مدياك حقك في التقييم 
حاول متديش تقييم وحش للعميل خصوصا فى اوبر لان اعتقد فى بعص الاحيان ان الشركه بتردلك الموضوع من عندها بتققييم وحش بنزلك في الابلكيشن .. قولت اشعر و لكن لست متاكد 

** معدل القبول و الالغاء

محدش بيجبرك تركب حد انت مش عاوزه فى عربيتك عشان كده عملو معدل القبول و معدل الالغاء 
معدل القبول هو ان لما بيظهرلك مشوار على الابلكيشن بيبقي معاك كام ثانيه تشاور نفسك اقبل المشوار او ما اقبلوش  .. لازم معدل قبولك للمشاوير يبقي عالى لان ده بيتوقف عليه حاجات كتير اوى فى حساباتك مع الشركات و منها البونص مثلا 

معدل الالغاء و هوه انك بعد ماتقبل الرحله وانت رايح للعميل او لو لقيت العميل مكانه بعيد او ملقيتش العميل اصلا معاك حاجه اسمها معدل الالغاء لكن احذر منه فى اوبر لانها مبتتساهلش في الموضوع بتاع الالغاء ده ابدا .


نصائح مهمه جدا و اسرار مش موجوده عالنت اطلاقا

1- لازم يبقي في جيبك فلوس بزياده لان لو عملت كام مشوار فيزا و فلوسك خلصت مش هتروح البنزينه تديهم الابلكيشن .. لازم تديهم فلوس 

2 - متحاولش و انت لسه مبتدى تلعب العاب خطيره (استنا لما تتودك فى الشغلانه ) زى مثلا ان تظبط مع العميل  اما تروحله و تقوله اوديك المشوار اللى انت رايحه و تدينى كذا و ننفض للشركه .. الشركه بتعرف و بذات اوبر و برضه مبيفاهموش عشان ده اكل عيشهم

3 - لو العميل حسابه 49 جنيه و ادالك 50 اوعى تنسي تحطله الجنيه بتاعه في المحفظه  بتاعته .. كده كده بعد انتهاء الرحله بيطلعلك خانه تسالك العميل دفع كام اكتب اللى خدته من العميل بالضبط (المصريين مبيرحموش لو لهم جنيه باقى )

4 - حاول تضحك في وش العملاء و حتى لو ملكش مزاج للكلام ولو العميل اتكلم ياسيدى جامله بكلمتين ... هوه ضيف عندك في العربيه ... لكن مش معنى كده بقي تنزل كلام مع الستات الحلوه و تقولى انا قريت كده عالنت متخربش بيتنا يعم ..

5 - باستمرار خلى عربيتك نضيفه و معاك شويه معطر رشهم و متشربش سجاير في العربيه خالص  .. عملاء كتير بتنزل تكتب تقارير زى الزفت 

6 - لو لقيت حد معاه شيل كتير ابقي ساعده او حتى اعرض عليه من باب المجامله  ومش هقولك العملاء ملايكه فيهم الكويس و فيهم الوحش لكن خلى كلامك حنين معاهم (الشعب بتاعنا سهل تكسبه بكلمه حلوه )
كده كده هوه هيدفعلك اجره المشوار لكن صدقنى التقييم القليل بيحرق الدم  وده مبتعرفوش الا لما بينزل 

7 - لو اتكرر معاك عميل مرتين في مده قليله او عملت مشوار قصير ابقي ابعت تقرير من الابلكيشن بتاعك للشركه عرفهم اللى حصل .. هما بيحبوا كده بدل ماتلاقى رساله تحذيريه منهم و انت معملتش حاجه 

8 - اوعى تضرب رحلات عشان تاخد البونص عشان برضوا بيعرفوا 
ماهو حضرتك لما تفهم الدنيا هتبتدى تشغل مخك ... اللى قبليك شغلوا مخهم كتير اوى مع الشركه عشان كده الشركه اتعلمت تقفش اللى بيشغل مخه و هتنهى الشغلانه من قبل ما تبتديها 

9 - ملكش مزاج للشغل اقفل الابلكيشن و روح .. اوعى تطلع زهقك علعملاء و لازم تكون نايم كويس و تكون فايق عشان تحافظ على مالك و عربيتك الشغل مش هيطير 

10 - لو جالك بلوك من كريم هتقدر تتفاهم معاهم و تحل الموضوع  ... اوبــــــر انسي ثم انسي هيقولك البلوك جاى من الشركه الام و مش هنعرف نعملك حاجه ..  احذر في التعامل مع اوبر 

11 - لو خدت بلوك اوبر هتلاقى ناس عالنت كتير اوى بيقولك نرجعك تشتغل تانى .. هوه بيعمل ايه .. بيغير في الورق بالفوتوشوب و بيرفعه للشركه تانى 
الشركه بتقفش الموضوع و بتقفل الابلكيشن و بتروح عليك فلوسك اللى دفعتها للى بيعمل الفوتوشوب 

12 - احذر من انك تشترى فحص او تحليل مخدرات من حد بيعمله بالفوتوشوب لان الشركه بترجع على اسم المركز المثبوت في الورق اللى انت رافعه و تستعلم هل الكلام ده صح و الا ملعوب فيه 

13 - لما يجسلك ريكويست يعنى مشوار بالبلدى اتصل بالعميل متستناش هوه يتصل بيك او تعتمد على الجى بى اس و تاخد بعضك و تروح لانه ممكن يبقي فى مكان تانى او واحده بتطلب لبنتها او واحد بيطلب لمراته اتصل احسن عشان تعرف هوه واقف فين و تطلع عليه علطول 

14 - فى ناس بتتصل بالعميل و تقوله انت رايح فين ... ؟  مش هقول ده تصرف صح و الا غلط .. لكن عمرى ما عملتها و لا ناوى اعملها .. عشان كده باخد مشاوير زى الزفت و عادى مش فارقه 

15 - اوعى تزعل نفسك .. الرحله خلصت وانتهت حلوه وحشه المهم انها خلصت و بص للرحله اللى بعد كده و متشلش في نفسك يا جميل ربنا يسترها عليك

16 - اوبر و كريم مش مرخصين ... حاول تلم الدنيا مع اى كمين ده لو الضابط قفل عليك الكمين يعنى و ابتدى يسالك عن الركاب .. متفتكرش ان اوبر و كريم مصرح لينا ككباتن اننا نمشى باسمهم .. لكن فيه ضباط يتعدى الموضوع و متساهلين
بس نصيحه اوعى تكدب عليه عشان ممكن اللى معاك ده يبقي مطلوب لدى جهه معينه.. لو قلت قريبى يبقي هتلبس معاه .. واحذر ان الضابط يعملك مخلفه حموله ركاب بالاجر لان فيها اعاده ترخيص و سنين سوده بعيد عنك.

17 - لو واحد طلبك و اداك علبه كبريت توصلها اى مكان اوعى تستقل بالموضوع او تضايق ياما وصلنا مفاتيح شقق و حلل محشى 

18 - لو انت مسلم و سمعت الاذان و انت فاضى وواقف فى الشارع ادخل صلى جماعه .. صدقنى هتطلع تلاقى رزق مكنتش هتاخده لو وقفت في مكانك للصبح (نصيحه خاصه بى شخصيا و لا افرضها على احد )

19 - هتلاقى الشباب عالجروبات بيشتكوا من قله الشغل لكن اعلم ان دى ارزاق رزقك مش زى رزق غيرك 

20- حاول تعمل قاعده عملاء لنفسك باسلوبك الحلو لان فى لحظه ان اجلا ام عاجلا مش هتلاقي الابلكيشن و لا الشركه لانهم ملهومش عزيز ممكن رحله واحده تقفلك الابلكيشن للابد

21 - لو انكسرت عندك حاجه في العربيه بسبب العميل اشتكى لله من ضعفك و قله حيلتك و رنا هيعوضك اوعى تبعت للشركه لانهم هيدخلوا العربيه فحص و شغلانه انت في غنا عنها 

و في الاخر بتمنى من قلبي لاخواتى الكل يشتغل و يرزق و ياكل عيش بالحلال و لو فيه اى تعليق انا تحت امركم راسلونى فى التعليقات

تحديث شهر يوليو 2020
اذا كنت قد اتممت قراءة هذا الموضوع فاتمنى من سيادتكم زيارة موضوعنا التالى حول اوبر و كريم فى ظل ازمة كورونا عبر هذا الرابط بالضغط هنـــــــــــــــا


تعديل : الموضوع السابق حصرى لموقعنا 100% و قمنا بكتابتة عن تجربة شخصية. و تم نشرة يوم 28/4/2020 للاسف قد قام احد المواقع الحديثة بنسخ الموضوع كلة و نشرة باسمها بدون الرجوع الينا بتاريخ 12/5/2020 و قد تم تقديم بلاغ لجوجل و جارى اتخاذ اللازم من قبل الشركة المحترمة .  




هل اعجبك الموضوع :

تعليقات